古時候有則寓言，某甲話中午天口熱，所以太陽最近；某乙話朝早太陽最大，所以距離最近，雙方拗到面紅耳熱，連孔子都冇符。咪畀人睇死，土地供應專責小組公眾諮詢即將完結，到最後都係好似「兩小兒辯日」咁，各說各話得個吉嘅咋！
不妨聽吓小組主席黃遠輝點講。佢話月底會向特首提交初步觀察結果，將會涵蓋包括發展棕地、公私營合作發展嘅農地儲備、粉嶺高爾夫球場、填海同埋發展郊野公園邊陲地帶等四至五個選項。佢又強調，小組無既定立場，目前仍未掌握公眾諮詢嘅數據，一切要到最後報告先有結論咁話。至於要幾多土地至足夠，佢就話最好「鬆動少少」，以「面對不可預知嘅情況」喎。
講就好聽嘞，實際係點仲要睇過至知。大家有眼見，之前幾次公眾論壇，各色反對團體爭相踩場，幾乎搞到開片咁滯，所謂「最後報告」，「結論」睇怕又係「眾說紛紜」、「缺乏共識」。係人都知，香港地意見多元，人多口雜，如果下下等到有「共識」先至做嘢，蚊都瞓蛇都死！
最離譜嘅係，港府呢頭話諮詢公眾，嗰頭有晒既定立場，特首暨行會成員赤膊上陣，推銷填海大計，一時話要「幫海出聲」，一時話要喺東大嶼山興建人工島，結果畀人話係「假諮詢」。
冇錯，對於地少人多、寸金尺土嘅香港嚟講，填海不失為大量增加土地嘅辦法，好似新加坡咁，地方仲細過香港，但勝在開發土地多管齊下，淨係填海比率已經冇得揮，家陣獅城人均居住面積遠勝香港。可惜吖，新加坡得，偏偏就係香港唔得。好簡單，港產官僚覓地建屋只係葉公好龍，人哋新加坡政府一聲令下填海造地，連權貴專用嘅高爾夫球場都要「為國犧牲」，反觀特衰政府，叫佢收番高爾夫球場同佔用官地嘅私人俱樂部興建公營房屋，牙痛咁聲，向弱勢群體開刀就鬼咁積極，正所謂「不患寡而患不均，不患貧而患不安」，試問市民點會服？港府由曾蔭權爵士時代開始已經提出喺維港以外進行填海大計，結果築室道謀十年有多一事無成，就係咁解。
港產官僚自己都識講，土地供應不足，「麵粉」貴「麵包」自然水漲船高。咁多年嚟拓土建屋無寸進，最終益咗邊班人，畫公仔唔使畫出腸。特衰政府成日畀人話「官商勾結」，絕對唔係冤枉。
講多無謂，食多會滯。一眾無殼蝸牛不妨學似深水埗「南亞村」咁，佔領禮賓府同「門常開」，實行喺裏面大興土木，安居樂業，到時自然「天下寒士俱歡顏」喇！