政情：睇淡樓市插15% 高叔平投資債券避難
做鐘錶生意嘅上海總會副理事長高叔平（Henry）近年投資多元化，無論樓市、股市或私募基金都有涉獵，對於依家中美貿易戰持續，加上加息周期來臨，Henry分析會令到投資環境生變，佢睇淡樓市前景，依家資金最佳避難所係債券咁話。
唔會趁低吸納
Henry話，依家投資股票嘅風險太大，至於樓市已經輕微下跌，佢有好多地產界朋友都一致睇淡，認為明年至少跌一成半。咁會唔會趁低吸納？佢耍手擰頭話，地產嘅變現性低，所以最好咪掂住。
通常投資環境風險太大時，好多人都會奉行「現金為王」策略，事關揸現金最穩陣。不過Henry認為，如果資金想尋找避難所，可以考慮買債券，趁現時息口上升，慢慢買啲，收吓息。之不過，由於預期加息周期唔會太長，否則就會影響整體經濟，所以市民都要留意形勢嘅變化喇！