政情：容海恩入定媽媽谷 BB性別賣關子
將成為立法會首位任內生BB嘅新民黨議員容海恩（Eunice），依家懷孕四個月，而正常照超聲波已知道BB性別，Eunice承認已知BB係仔定女，不過就大賣關子，打算BB臨出世前先公布。而作為準媽媽，Eunice已經急不及待加入媽媽谷，同其他一樣預產期喺明年二月嘅媽媽溝通交流。
Eunice話，媽媽會入面分享好多懷孕資訊，好似搽咩油可以防妊娠紋，另外有咩要注意等，不過，Eunice話怕搽到個身黐立立，依家未開始搽。講到遲吓可能會半夜腳抽筋，問到第時會否叫老公袁彌昌起身按腳，Eunice笑言老公唔會睬佢，仲會踢佢落床添。
葉劉倡投影技術 方便放假投票
講開生仔經驗，同場嘅新民黨主席葉劉淑儀憶述，自己當年因為賀爾蒙分泌不足，懷孕後要臥床休息。佢又提及政府成日講創新科技，應該考慮用投影或其他技術，讓Eunice放產假都可以投票。至於將來會否同Eunice嘅BB上契，葉劉話要問吓Eunice，而Eunice即時回應話求之不得，Eunice嘅BB真係未出世就萬千寵愛在一身嘞！