政情：鬧鳥籠政治 當初又參選 羅冠聰認蠢兼懶
眾志前主席、現任眾志常委羅冠聰嘅政治生涯「大上大落」，政治高峰係二○一六年立法會選舉港島區直選當選，成為史上最年輕嘅議員，之不過好景不常，佢上任一年多時間就因宣誓風波被取消議員資格（DQ），據報羅冠聰成日批評議會係「鳥籠政治」，又話年輕從政者面對嘅牆壁會愈來愈難跨過，咁為乜又要去參選？羅冠聰自認一切係因為自己蠢兼懶，仲話坐完監出嚟面對嘅疑惑人生，需要時間沉澱喎。
羅冠聰尋日出席一個論壇講述香港青年政治前景，期間佢主動分享自己面對嘅困惑，話兩年前都曾被邀請作類似題目演講，當時充滿幹勁，但經歷咗好多嘢後，已經變為感到疑惑，佢舉例指，有反新界東北案被告，四年前同自己一樣都係學生，毫無包袱，而時至今日，有人做保險，有人做店員，又有人做生意，可見年輕人喺一定時候要做選擇，可能就係更關注家庭同工作。
對於何解一方面鬧議會係鳥籠，另一方面又要參選，羅冠聰話出獄後回望過去，就覺得自己係蠢同懶，因為佢喺一四年佔領行動累積咗好多人支持同尊重，但當時冇深入思考，有咩方法可以更快將實際支持變為資源，並認為最方便做得到就係參選。
羅又話，年輕從政者面對嘅政治氣候同以往不同，舉例指眾志未能註冊成為社團或公司，而眾志成員又唔可以參選，相信未來都唔會重返議會，因此要思考未來路向。
話冇得同人講議會冇用
不過說到底，最令羅冠聰覺得掙扎嘅係，市民話因為其議會工作做得好而支持自己，搞到佢冇可能同人講議會無用，為此覺得更為疑惑。佢又強調，唔可以再用以前方法去累積市民支持，至於同佢哋一樣被剝奪權利嘅團體，亦唔會因為唔參選而消散。
既然如此，咁將來路向何去何從呢？羅冠聰話，其實民主派都面對同一問題，如果本土派於前年嘅選票冇咗一半，民主派都會好「頭痕」。
話時話，身為「雙學三子」之一嘅羅冠聰，因為衝擊俗稱「公民廣場」嘅政府總部東翼前地，曾經淪為階下囚，聽佢尋日演講嘅內容，又自認蠢兼懶，似乎有多少覺今是而昨非嘅意味。其實同羅冠聰同屬眾志嘅周庭，今年初參選立法會港島區補選時，因主張民主自決被DQ，自此眾志從政之路基本夢碎，若然眾志一眾核心可以如羅冠聰般，有多少政治領悟，唔知歷史會否因而改寫？