公立醫院輪候時間長，唔少人都希望靠熟人打尖，盡快得到診治，過往都聽過唔少例子。不過，立法會醫學界議員陳沛然就有唔同睇法，連外父都無情講。

陳沛然尋日喺網誌自爆，外父最近要去公院做手術，佢與同樣身為醫生嘅太太當然擔心，但就選擇尊重外父同埋主診醫生，唔敢向醫院求助，即使外父手術後傷口發炎要住多幾日，依然半句聲都唔出，更形容去探病時要微服探病，因為唔想向醫生護士施壓咁話。

佢更透露醫院常見嘅畫面，就係醫生護士會遇到特權分子，仲有人收過議員同政黨卡片添，結果搞到醫護工作百上加斤，但又敢怒不敢言咁慘。佢又為業界出聲，批評特權分子容許打尖已經唔啱，仲要施加壓力，建議佢哋唔好運用權力，而係乖乖畀錢睇私家。佢更叫業界幫手搜集證據，之後交畀其辦事處，就會有專人跟進嘞！各位知名人士真係要醒醒定定，唔好以為打尖無人知喇！