政情：香港回歸儀式前 查理斯講稿遭棄垃圾桶
英國王儲查理斯喺一九九七年代表英女王，將香港主權移交中國。近日一本皇室傳記披露，當年交接儀式開始前，王儲查理斯嘅講稿曾被清潔工丟進垃圾桶中，幸好被侍從官發現，及時執番。
皇室傳記作家新書爆料
英方喺九七年六月三十日傍晚時分，喺添馬艦舉行告別儀式，至午夜前舉行交接儀式。皇室傳記作家哈德曼（Robert Hardman）嘅新書《世界的女王》（暫譯，Queen of the World）公開咗王儲查理斯嘅驚險經歷。喺告別儀式開始前，王儲查理斯嘅侍從官、英國海軍少校萊弗里（John Lavery）將查理斯喺交接儀式上宣讀嘅講稿放喺大看台嘅座位上，再為查理斯引見賓客。
然而，萊弗里不久後就發現講稿不翼而飛，不知所措，更擔憂自己嘅仕途毀於一旦。佢睇到一名清潔工正清理垃圾桶，於是上前查看。幸好，細心嘅佢喺垃圾桶中搵番份講稿，立刻執起講稿還畀查理斯。該書更形容，清潔工「過度積極」。