政情：劉小麗涉偷步籌款 團體促廉署徹查
政界盛傳食物及衞生局前政治助理陳凱欣及立法會前議員劉小麗有意參與立法會九龍西補選，而陳劉二人同日被是非纏身，其中團體「同心護港」一行十二人尋日到廉政公署外示威並作出舉報，質疑劉小麗偷步籌款涉違規，促廉署徹查事件。
陳凱欣連環辭職
團體代表批評，劉小麗所屬工黨嘅立會前議員李卓人，當年收取壹傳媒黎智英秘密捐款冇向立法會申報，及至劉小麗喺上月晚宴疑為選舉籌款，並將款項直接存入佢所屬工黨嘅銀行戶口，團體促請廉署跟進事件。
另一邊廂，陳凱欣近日連環辭職，佢證實前日已辭去出任約一個月嘅九龍社團聯會「健康大使」職務，喺上個禮拜亦已辭任社企「好聲」行政總裁。而我哋亦發現陳凱欣原本喺紅磡殯儀館附近嘅巨型外牆廣告已拆除。
九龍社團聯會證實前日收到陳凱欣辭去「健康大使」嘅書面通知，又話陳應允繼續履行大使責任，直至物色到新任大使先退任。至於陳凱欣嘅巨型外牆廣告已拆除，九龍社團聯會理事長王惠貞稱一早同廣告公司協定，如掛三號風球或以上，基於安全因素，有關廣告必須拆除。