政情：立會訪英團 驚打風冇得走 諗計延期返港

立法會代表團喺本周日啟程到英國，係倫敦時間九月十日至十四日，喺倫敦同愛丁堡進行為期五日嘅議會訪問，而代表團由教育界葉建源領隊，副團長則係自費出席嘅會計界梁繼昌，其他議員包括資訊及科技界莫乃光、紡織及製衣界鍾國斌、勞工界議員陸頌雄，地區直選議員就有楊岳橋、尹兆堅、何君堯、林卓廷同區諾軒。

代表團行程緊湊，先喺倫敦同英國國會議員會面，尋日更坐內陸機飛往愛丁堡，與蘇格蘭政府代表見面及探訪當地議會。由於「山竹」似乎會強勢襲港，據了解，一眾議員前兩日已有討論回程問題，有意見擔心如等航空公司決定是否取消航班，更難搵機位回港，遂決定着立法會秘書處查看，可唔可以改喺下周一回港。

尹兆堅話回程同「山竹」撞到正，避免引發成十個議員等候補位，部分議員考慮改期返港，不過額外費用就可能需要議員自付。鍾國斌就話未知會唔會滯留，但強調就算個風傍晚先打到香港，點都博唔過當日搭飛機，陸頌雄亦有擔心，但據佢所知好似無機位可以改，所以至今仲未有最終定案。反而區諾軒則堅持唔改期，想盡快返港出席下周區議會會議，笑稱「Let God save me（讓神拯救我）」。

秘書處：有需要會另訂機位

秘書處回應話，除自行安排回程嘅數位議員外，代表團按行程喺後日上午抵港，秘書處正密切留意天文台公布嘅颱風消息，有需要時會為代表團向航空公司另訂機位回港，又話已為代表團購買旅行保險。

另外，特首辦主任陳國基亦將喺後日帶隊到北京參加學習班，所有政治助理、五至六名副局長同政策創新與統籌辦事處部分研究主任都會參與。據知，今次行程定喺本月十六日至二十三日，有出席者近期多次查詢會否改行程，最後維持如期成行。

天文台料「山竹」喺周日傍晚最接近香港，仲可能係史上撲港最強嘅颱風，怕且難有飛機可以出入境，兩團人都係留喺安全地方好過搵命博喇！