中環出更：曾蔭權正服刑 太太細仔感恩祭祈福
正喺獄中服刑嘅前特首曾蔭權爵士，下月即將度過七十四歲生日，距離其生日不足一個月，有人發起昨晚喺聖母無原罪主教座堂舉行政府人員感恩祭，曾蔭權太太曾鮑笑薇同細仔曾慶淳，以及多名曾與曾蔭權共事嘅官員都有出席，未知有冇同曾蔭權祈福？
喺傍晚約七時半，聚會開始，而約喺七時四十分，曾鮑笑薇、民政事務局前常任秘書長李麗娟同公務員事務局前局長俞宗怡一同坐車到場，至於曾慶淳則喺約十分鐘前坐的士到達。多名政府官員都有出席是次聚會，包括喺曾蔭權做特首期間，曾任特首私人秘書嘅現任發展局常秘甯漢豪，同曾任特首辦常秘嘅現任食物及衞生局常秘謝曼怡、食物及衞生局局長陳肇始，以及民政事務局常秘謝凌潔貞等。
有人讀出由曾寫嘅英文信
為今次聚會主禮嘅係天主教香港教區副主教陳志明。據知曾蔭權亦得悉今次聚會，有人喺聚會中讀出一封曾蔭權寫嘅英文信，但未知出席嘅人士是否喺聚會中幫曾蔭權祈福。約八點四十五分，聚會結束後，教友陸續散去，而曾鮑笑薇、曾慶淳同李麗娟就一齊坐車離開。
卓妮