中環出更：整動畫似做紙紮難唔到黃宏達
每年一度嘅香港文化節又嚟到，今年其中一個重頭戲就係非物質文化遺產新媒體展覽，以各種新穎嘅方式如動畫、電腦特技、全方位視點等科技呈現一啲中國傳統文化，包括武術、舞火龍等，有份參與製作嘅電影視覺效果導演黃宏達今次整咗個可以360度睇嘅打功夫動畫，話製作過程相當困難，事關要表達嘅唔止係一個動作，仲要展現到佢剛勁有力，不過佢憑家族紙紮生意學番嚟嘅本領，製作動畫似乎就難唔到佢，唔通賣紙紮同做動畫都有關係？
黃宏達解釋紙紮製成前會用竹紮成雛形，而製作動作嘅起點都係呢啲線條，做好個模先會再加唔同嘅外表，所以細細個就耳濡目染嘅佢都話自己有繼承家族生意，只係轉換咗另一種表達方式啫！另一個新媒體藝術家又一山人都笑佢一直都係「走在最前」，事關佢哋二十年前合作時都係用當時最新嘅技術製作廣告，所以需要不斷學習，例如今次佢整嘅舞火龍嘅動畫就因為動作較大，要喺戶外製作，結果連整動畫都要「外景」，過程都搵過唔少人幫手研究可以點做。
文化節創辦人趙式慶就話有需要用新媒體方式去表達傳統文化，因為呢啲傳統文化流失速度好快，所以講保育嘅時候，首先就要「保」住佢，而文字、相片、短片都有各自嘅限制，採用新媒體方式可以更全面咁紀錄有關文化，而且令人有新鮮感，但佢強調新鮮感只係其中一部分，因為長遠而言，紀錄當中嘅文化、源流、起源、當時嘅社會價值先係最重要嘅。
李美嫦大讚新媒體精彩
康文署署長李美嫦都大讚呢啲新媒體精彩，佢試過喺現場睇過舞火龍，因為好大煙嘅關係就唔係睇得好清楚，但氣氛就好熱鬧，相反新媒體版本就可從多角度睇得更清楚，更能展現舞火龍嘅美感同藝術感，認為兩種表達方式可以相輔相成，咁就可將有關文化有效咁承傳落去喇！
卓妮