強哥和明仔都是理髮店理髮員，有天工作時，強哥見到明仔的手又紅又腫，於是問：「徒弟仔，你對手做咩又紅又腫，仲有小水泡同甩皮呀？」
明仔答：「係呀，呢排唔知咩事，雙手成日痕，不過見放假情況有改善就無理，點知啱啱幫客人染髮後又係咁。」
強哥道：「梗係啦，我見你幫客人染髮都無戴上手套。我初初入行時都好似你咁出現手部皮膚問題，當時醫生話我患上刺激性接觸性皮膚炎。其實我哋幫客人剪髮、染髮同電髮，經常接觸理髮用品，好似洗頭水、護髮素、電髮劑同染髮劑都含有不同嘅化學品，雙手又不停濕水，皮膚就會容易過敏。」
明仔再問：「咁有啲乜嘢預防措施可以避免患上刺激性接觸性皮膚炎呢？」
強哥回答：「可以從多方面入手。首先選用不同理髮用品時先細閱化學品標籤，選用對皮膚刺激較少嘅產品。同時亦要跟從產品說明書建議，採取相應預防措施；而用防護手套可以減少直接接觸電髮劑或染髮劑等化學品，或者用專用嘅護膚隔離劑保護雙手；最後雙手濕水後要盡快抹乾，接觸過化學物品要用性質溫和嘅清潔劑清潔雙手，再塗上潤膚霜保護。你睇吓我雙手，之前患刺激性接觸性皮膚炎，依家已經透過以上措施改善喇。」
明仔答：「明白喇，我會先去睇醫生，同埋做好有關預防患上刺激性接觸性皮膚炎嘅安全措施喇！」
職業安全健康局
www.oshc.org.hk