政情：容海恩二月生B 趕及𢭃利是
上個月奉子成婚嘅新民黨立法會議員容海恩（Eunice）唔認唔認還須認，啱啱過咗嘅星期日（9日）佢先至承認有喜，尋日（12日）更進一步向傳媒透露，預產期係明年二月，即係已經有咗四個月。計落BB都幾識揀日子出世，因為明年二月初就係農曆新年，阿B趕得切𢭃利是喇！
Eunice喺七月突然爆出婚訊，八月十日即閃嫁該黨政策總裁袁彌昌，仲傳出係雙喜臨門。但Eunice一直唔肯認，依家睇嚟，之前唔認可能係因為怕未夠三個月就對外公開，BB會小器。
冀開先例 通過五日侍產假
雖然未知阿B係男定女，不過應該都係個懂事嘅BB嚟，事關佢幾識揀日子報到，𢭃利是係其一，其二係立法會最快今年底可通過將男士侍產假由三日加至五日，咁爸爸袁彌昌就有機會放多兩日假喇！呢啲福利都係次要，最重要係立法會對議員放產假有咩安排，話晒Eunice都係首位喺任內生BB嘅議員，希望可以開個好好睇睇嘅先例喇！