中環出更:食無定時易患情緒病 鍾國斌話唔驚

都市人工作忙碌,食無定時嘅情況非常普遍,不過近日有研究指,飲食愈不規律愈大機會患上情緒病。早前卓妮喺一個活動上見到經常趕場嘅立法會議員鍾國斌(Felix),佢就話自己一向飲食定時,出席活動前會食定嘢,避免太夜進食,所以唔使驚。

講開情緒問題,Felix話佢反而留意到近期開學,唔少學生都有抑鬱等情緒問題。不過佢自稱經佢一點,好多年輕人就可以解開鬱結喎!佢解釋話,唔少後生仔都係為前途苦惱,雖然現時職場上重要位置都由戰後嬰兒潮出生嘅一代擔任,但佢哋十幾年後就會離開職場而騰出大量向上流嘅位置,機會自然落喺已經累積咗唔少工作同人生經歷嘅九十後身上。咁講,即係要年輕人畀啲耐性等啫!

陳淑玲去非洲旅行減壓

當日活動係香港貿發局主辦嘅香港國際時尚匯展,中華廠商聯合會常董陳淑玲、貿發局成衣業諮詢委員會主席梁嘉彥、商務及經濟發展局局長政治助理馮海容等人都有到場。講番飲食規律問題,馮海容話因工作關係,都經常食無定時,所以佢會少食多餐,假日就依時進食補番數喎。跑咗六至七年長跑嘅佢,依賴做運動減壓,所以今個夏天都曬黑咗唔少。佢有報名參加下月舉行嘅渡海泳,不過仲未接受水試,睇嚟要下苦功作吓準備喇。

陳淑玲就覺得,想宣洩壓力最重要係搵到渠道。佢有宗教信仰幫手,另外旅行都係良策,因為離開香港時個人特別輕鬆,又唔怕畀人認出,好似今個月就會去非洲喇。

卓妮

第一手消息請下載on.cc東網iPhone/iPad/Android/Windows Phone Apps