試諗吓，兵唔捉賊，貓唔捉老鼠，仲成世界嘅？呢嗱，眼下嘅香港，玩忽職守嘅人多的是，淨係講食環署嘅外判承辦商咋，明明負責收集垃圾，點知轉吓眼就變成垃圾製造者，有冇再離譜啲吖。
係咁嘅，元朗洪水橋田廈路日前驚現一座一米高嘅垃圾山，冤崩爛臭，途人紛紛掩鼻逃走。邊個咁大整蠱？原來有垃圾車將垃圾公然喺路邊卸下就揚長而去，呢架垃圾車唔係普通垃圾車，正正係食環署外判垃圾收集服務承辦商嘅垃圾車。即係話，外判商收咗公帑唔做嘢，仲非法傾倒垃圾添，話係無法無天都冇誇張。
更令人難以置信嘅一幕還在後頭。話說街坊難頂惡臭向食環署投訴，食環署居然擘大眼講大話，聲稱未有發現垃圾堆積，問你服未。好彩天網恢恢，疏而不漏，整個傾倒過程被天眼拍下，警方介入調查，食環署終於死死氣派人清走垃圾，兼改口承認承辦商未有按合約規定處理垃圾，會發出嚴重失責通知書及扣減服務費喎，呢啲咪正一係四方木，唔踢唔識郁囉。
睇到喇，食環署對外判商嘅監管有幾敷衍塞責，有幾馬虎兒戲，一鋪現晒形。上樑不正下樑歪，正因為食環官僚其身不正，連監管責任都外判，承辦商先至會肆無忌憚蛇王吞POP。可以肯定講句，今次只係冰山一角，類似情況每日發生又有乜出奇。
話時話，政府嘅外判制度，真係令人冇眼睇。小至食環署外判服務承辦商，大至路政署外判大型基建承辦商，無一唔係糊裏糊塗，冇監冇管。淨係一間禮頓咋，偷工減料、弄虛作假乜都齊，居然一再奪得政府大合同，就知當局嘅監管形同虛設。古人話，禁而不止，則刑罰侮，港府有法不依，執法不嚴，唔亂象叢生至奇喇。
再講吖，食環署衰格已經人所共知，搞衞生又好，管理街市又好，處理小販都好，冇一瓣搞得掂，冇一瓣唔激起民怨。最近登革熱大爆發，食環署平時滅蚊不力都算，到家陣仲係懶懶閒先至最大鑊。呢，本報早前直擊食環署一個防治蟲鼠小組胡混怠工，唔係全日「零工作」，就係日做三粒鐘咁大把。仲有呀，申訴專員公署批評食環署管理混亂，轄下街市唔係被人擅自改變攤檔用途，就係營運時間不足，甚至亂收租金。都未講對住擺街邊嘅阿婆阿伯就兇神惡煞，對住南亞兵團就鵪鶉龜縮，畀人叫做港產城管就係咁解。
見微知著，食環署不過係整個政府胡混度日嘅縮影咋。這些年，南亞兵團肆虐香江，港獨歪風氾濫成災，牛鬼蛇神囂張猖狂，家陣知咩事喇。