政情：黃達強：年輕人嬌生慣養 令自助洗衣店興起
自助洗衣店近年愈開愈多，原因除咗港人居住面積愈來愈細之外，亦同年輕人嬌生慣養有關。香港特許經營協進會主席黃達強話，生活條件日趨富裕之下，好多人都喺百般呵護嘅環境中成長，導致後來離開父母獨立生活，不但唔識用手洗滌衣物，就連點樣操作洗衣機亦一籌莫展，譬如住喺宿舍嘅大學生，要將污糟衫帶返老家處理實在費時失事，而操作簡便嘅自助洗衣，就正好迎合呢個時代。
建議附設茶座或理髮
黃達強又話自由行退潮同網購興起，令到香港舖租由三、四年前嘅高峰逐步回落，自助洗衣店先至得以如雨後春筍般廣泛出現。佢認為將來嘅自助洗衣店可附設服務如茶座或理髮，顧客就可以充分運用自助洗衣嘅等候時間。
自助洗衣方便，但佢話試過有「大頭蝦」嘅客人，喺店內遺留手袋或手提電腦等貴重財物，就因為有閉路電視，物件喺人來人往嘅自助洗衣店內先會紋風不動，由此可見港人嘅德行都算唔錯。