政情：梁青華曾拜師練拳 仲上過擂台
早前亞運閉幕，香港運動員攞到唔錯嘅成績，獎牌數目破咗紀錄，但香港鐘表業總會前主席梁青華話冇乜留意，事關睇亞運嘅渠道實在太少，但其實佢年輕時都經常睇拳賽，因為佢都有玩自由搏擊，甚至上過擂台添！
當時佢十八、十九歲左右，練拳練咗三年幾，睇落時間雖然唔長，但其實佢相當勤力，每朝五點就起身跑步上山練氣，後嚟師父覺得佢有實力，就畀佢上過兩次擂台，結果都贏到一場，成績算係唔錯。
慨嘆師徒關係已少見
佢仲話當時係一邊工作一邊學功夫，學咗一排之後就直頭拜埋師，搬埋去拳館住，每日收工之後就返拳館幫手打掃，有時仲會做埋助教，擺咗好多心血落去，可惜後嚟因為要做嘢搵食，結果冇再練。時至今日師父已經過咗身，但佢仲有同其他約二十幾個師兄弟聯絡，當中有啲人都有開班教拳，佢慨嘆今時今日教拳多數都係師生關係，以興趣班模式為主，以前嗰種師徒關係睇怕都好難再見到喇！