政情：觀塘區會外訪似旅遊 泛民唔多吼

區議會有關外訪嘅文件，簡介外訪行程有都江堰、熊貓基地、樂山、望江樓公園、錦里古街等，似去觀光多過似考察，但觀塘區議會主席陳振彬解釋，嗰份行程只係用嚟報價，係旅行社同佢哋講如果去呢啲地點就大概要五千元，等區議會可以有個預算，而實際行程就未定，要等四川政府安排。其實係要去睇交通、垃圾處理等設施都唔係亂咁噏，事關陳話俗稱「啟德單軌鐵路」嘅環保連接系統、馬游塘中堆填區等都係觀塘區正在處理嘅問題，所以就想透過今次考察去睇吓人哋點做，可唔可以套番落觀塘區，所以到時都會係睇社區基建同設施，絕對唔係觀光。

計劃四川考察基建設施

據知大部分該區民主派議員都唔打算去今次外訪，其中畢東尼就話之前區議會最初諮詢地點係港珠澳大橋同粵港澳大灣區，佢當時都有啲興趣，一方面地理上較近，另一方面同香港有關連，實用性相對較高。雖然最後區議會決定去四川，但佢話睇到文件上嘅簡介，指會去睇交通基建、醫療、垃圾處理設施時都覺得幾吸引，可惜後嚟睇到初步行程後又覺得同簡介有出入，觀光性質較重，達唔到外訪作用，甚至覺得同自己外訪嘅原則有出入，所以決定唔去。

其實唔單止行程，費用嘅問題一樣有人關心，事關首次外訪時，只係大部分議員用咗六千幾元，但根據區議會文件顯示，有議員其實已經用咗九千五百元，即係得返五百元撥款，要去第二次的話，就大部分費用都要自費。區議員陳華裕話唔知邊個用咗咁多，但以佢所知大部分議員都只係用咗六千幾元，所以就算今次要補貼都唔會好多，加上今次嘅五千元外訪費用都係初步，實際數字要視乎旅行社報價而定，所以冇聽過有議員因為錢嘅問題而唔想去。咁睇嚟最大嘅爭議都係在於行程，希望班議員真係去做實事，唔好拎啲公帑去觀光喇！