中環出更:利子厚話囡囡夠開朗開學唔使點適應

莘莘學子啱啱開學,唔少小朋友經過漫長嘅暑假,要再重返校園生活都唔太習慣,亦有啲抗拒。早前喺一個活動上見到馬會大董利子厚,佢話囡囡為人開朗,交朋友好叻,所以開學毋須特別適應,淨係要買套校服啫!

利子厚仲話打算遲啲送囡囡去英國讀書,以配合囡囡喜愛文學同藝術嘅性格,依家都先做好準備,囡囡今年升中,就由本地小學升讀國際學校,不過國際學校可能早放暑假,所以早喺八月中已開學,暑假都特別短,加上囡囡係小學嘅合唱團成員,今年暑假去咗東歐比賽,咁就更短嘞,不過佢比賽就贏咗唔少獎項,認真威水呀!

劉業強唔畀壓力小朋友

利又話趁住要出席朋友個仔喺夏威夷嘅婚禮,帶埋囡囡去嗰邊嘅幾個島,囡囡話要學滑浪,仲一試就學識滑浪添!

轉頭見到新界鄉議局主席劉業強同太太劉葉愛愛,講起三個小朋友喺英國讀書已經五年嘞,英國勝在假期多,加上通訊軟件方便,要見面都唔困難。劉太話小朋友都冇抗拒返學,會抗拒通常都係因為壓力大,但佢哋一向唔會畀壓力小朋友,加上英國學校嘅群體生活較好咁話。

至於律師會前會長蘇紹聰都帶埋太太Rainbow同兩個女兒出席活動,佢話大女做藝術文化工作,細女就做環保工作,即使兩個女兒都冇從事法律工作,佢都唔覺得失望,因為都係女兒自己揀嘅。真係開明嘅爸爸呀吓!

卓妮

第一手消息請下載on.cc東網iPhone/iPad/Android/Windows Phone Apps