江山易改，本性難移。咪睇律政司拖拉逾年，終於捨得就漢奸黎恐嚇東方報業記者案開綠燈，指示警方搵契弟錄口供，好似有啲眉目咁款，查實律政司只係做場大龍鳳咋，錄完口供半個幾月嘞，依然冇下文。所以話啫，律政司庇奸護淫呢鋪癮，點戒都戒唔甩。
呢嗱，據聞上個月十六號漢奸黎喺律師陪同下，不情不願咁去咗灣仔警察總部錄口供，事後一臉落寞返回何文田寓所，警方亦火速將口供等資料整理好，交回律政司等候進一步發落。正當全港市民以為契弟呢鋪衰硬、受害記者沉冤得雪之際，竟然嚟個反高潮，等了又等，等完再等，至今都唔見律政司採取進一步檢控行動。咁即係點？即係又玩捉放曹囉，又玩拖字訣囉，又玩姑息養奸呢一招囉。
喂，全世界都知，漢奸黎喺舊年六四活動後，爆粗辱罵兼刑事恐嚇東方記者，「×你老母×」、「我實會搵人搞×你」、「我影×咗你嘅相」，要幾兇狠有幾兇狠，仲要全程被攝錄機拍下，有圖有片鐵證如山。正如關注組織話齋，案件簡單清晰、黑白分明、人證物證俱在，根本冇抵賴餘地，律政司竟然拖延逾十五個月都唔作出檢控，簡直荒天下之大謬。連法律界人士都話，若然律政司認為證據不足，大可指示警方進一步搜證，否則就應該向警方提供控罪資料，指示到邊級法院提訴，而唔係好似家陣咁唔上唔落、唔嗲唔吊。
不過你咪理，律政司最叻裝聾作啞兼扮盲，一副你吹我唔脹嘅樣，擺明要包庇漢奸黎到底。唔係咩，漢奸黎旗下壹淫媒宣淫販賤、反中亂港嘅惡行仲臭過阿婆塊紮腳布，如果香港仲有王法，早就有人被罰到破產、將牢底坐穿嘞，點會搞到要受害人親自發聲討公道咁慘情呀。呢，東方前後九次去信律政司質詢檢控進展，受害記者尋日亦再度去信要求交代，律政司會唔會再次自打嘴巴，繼續違反《罪行受害者約章》嘅服務承諾，大家𥄫實呀。
冇計嘞，「反中亂港獲姑息，愛國愛港受打擊」，都見怪不怪咯。睇吓咪知囉，漢奸黎出錢出力指揮策劃佔中，冇事；大搞政治黑金，又冇事。大大把司法保護傘撐腰咯喎，正義傳媒想討回公道，邊有咁容易吖。漢奸黎錄口供呢單嘢，都係做戲咁做嘅咋，如果唔係東方將信件副本先後抄送特首辦、中聯辦、港澳辦同埋申訴專員公署，律政司避無可避，隨時連做場大龍鳳都慳番。
一句到尾，人在做，天在看。律政司必須盡快作出檢控決定，市民眼睛雪亮，以為搞假動作死拖爛拖就可以蒙混過關？咪使旨意吖！