立法會前議員劉慧卿（卿姐，左）三十多年前任職記者時，以背心吊帶裙造型出鏡為人津津樂道，兩年前出席黨友活動時，亦曾着番同一條背心裙，當時街坊見到都讚好。尋日卿姐又再着小背心，究竟佢見邊個，要出動到小背心呢？
雖然卿姐尋日並非着番當年嗰條背心裙，不過件紫色吊帶背心亦都非常「吸睛」，加上其手上戴埋紫色手錶，真係襯到絕。而佢尋日見邊個要悉心打扮呢？原來就係同香港浸會大學一位同學仔食晏，之後再齊齊去歎咖啡同蛋撻添！
其實卿姐食晏時係着咗一件白色外套，襯番條白色褲嘅，可能因為下晝熱啲，先至除咗件外套，露出紫色小背心啫。而佢前日亦喺社交網站上載咗食炸雞下午茶嘅照片，相中嘅佢就着咗件紫色短袖衫同戴紫色手錶。睇嚟卿姐呢排都幾鍾意紫色噃。
