政情：單仲偕遺失八達通 鬧爆冇得取消自動增值
八達通係好多香港人生活嘅必需品，立法會前議員單仲偕（騸雞）喺社交網站貼文自爆尋日朝早遺失咗有自動增值功能嘅八達通，但係聯絡完銀行同八達通公司都取消唔到自動增值呀！唔知佢會唔會損失慘重呢？
騸雞話係首次打去銀行取消自動增值，銀行職員好有禮貌咁回覆話，銀行系統上不能取消，而職員就話會主動協助佢聯絡八達通公司報失，八達通公司職員立即幫忙報失該張八達通，但亦無法取消自動增值。
要承受報失3小時內損失
佢引述八達通公司職員話，報失三小時後嘅自動增值，先毋須失主承擔，佢話即係失主要承擔三小時內嘅損失，批評點解銀行同八達通公司都取消唔到自動增值，叫大家將有自動增值功能嘅八達通放入保險箱，好好保管，千萬千萬唔好遺失喎。聽到火氣好大咁喎！