政情：陳振英買中山物業退休住
香港樓價愈升愈有，唔少人都會放眼內地或外國嘅物業市場，立法會議員陳振英（Ronick）上月申報喺內地擁有一個物業，佢接受查詢時話八月喺中山買咗個單位。唔通佢都覺得香港樓價高？佢就話買樓唔係投資，係為咗自用嘅，打算日後退休去住喎。
話自己做銀行 理財保守
Ronick話覺得中山交通都好方便，好快就去到香港，自己本身喺香港已有物業，所以喺內地買個單位自用，等退休可以多個地方住，嗰度又休閒過香港，退休隨時住中山多過留喺香港咁話。
買樓都係選擇自用，唔似一般港人都會諗住買樓投資，唔通佢有乜嘢特別心得？Ronick就話自己係做銀行嘅，所以都好敏感，理財會保守啲，買樓都係自住多，而投資方面，現金、股票同債券都有啲。