政情：馬化騰憂港府唔郁 創科好牌拆散出

楊偉雄早前撰寫網誌認晒叻咁話香港培育咗兩隻「獨角獸」，即成立不足十年、估值達十億美元以上嘅初創企業。攬住業界嘅發展當做自己政續，佢呢番言論就惹來IT界批評。尋日，曾經批評過港府喺創新科技發展上力度不足，要引入「創科問責制」嘅馬化騰又再出擊。話說佢尋日喺廣州出席一個論壇，講到香港IT發展時就話，香港二○○○年科網泡沫爆破後曾心有餘悸，有啲陰影，香港大企業同政府對科技產業唔完全認同及積極，認為政府同產業間應該更多聯合起來共同發力。

政策唔改 人才配套不足

馬化騰又以深圳推動創科工作為例，話喺IT發展上唔能夠完全依靠市場自然演化，而係非常需要當地政府主動搭台，坦言確實好焦急，作為企業見未來好有潛力，香港手上亦有好多「好牌」，但就好擔心呢啲好牌被搓成一張張「單張」打出去，唔能夠發揮效力。

立法會資訊科技界議員莫乃光就話香港嘅「好牌」包括資訊自由、法治、智識產權保障同人才，但政府一直唔知應該做啲咩去幫業界發展，到近年先話要搞產業化同智慧城市，已經畀人佔盡先機。佢又批評政府部門喺創科上推嚟推去唔肯做，官僚主義，法例唔改，科技唔用，好似市民買演唱會門票咁，每逢開售康文署管理嘅城市電腦售票網就被機械人程式攻擊，政府唔係冇錢，但就唔肯換，直言「最大嘅問題就係政府！」

智慧城市聯盟會長楊全盛亦都話香港基建、學府質素等都係有利因素，但本地人才培育政策做得慢，輸入人才方面又配套不足，業界想有多啲便利嘅政策時，一涉及修改法例，政府就耍手擰頭，認為政府面對問題係應該去解決。

楊偉雄即使唔識打牌，都有業界畀橋教路，但佢唔肯聽嘅話，輸嘅就唔止係佢，而係香港喇！