中環出更：馮檢基炮轟非建制派搞特權主義

立法會前議員馮檢基（阿基）今年七月同一手創辦嘅民協「分手」，另起爐灶籌組壓力團體，阿基尋日又再主動出擊，鬧爆非建制派有「三錯」，包括搞特權主義，威權復辟，放棄民主制度；佢又批評被取消立法會議員資格（DQ）嘅劉小麗放棄就DQ案上訴，仲話就算畀劉小麗再次喺立法會宣誓，都會出現尷尬場面。

距離立法會九龍西補選尚有約兩個半月時間，民主派今次無聲氣會搞初選，阿基稱，由於今年三月一次補選有搞初選，非建制派唔應該將經過長時間辛苦醞釀嘅初選消滅，揶揄民主派唔搞初選係唔民主︰「以前搞初選嘅就係民主派，依家只能夠話佢係非建制派。」

阿基又點名向劉小麗開火，直指對方唔應該為咗急於搶番個議席而放棄就DQ案上訴，因為放棄等於認同DQ。佢仲話，就算畀劉小麗喺補選贏到個議席都會出現尷尬局面：「到時宣誓又點？用番原來嘅宣誓或者更激，就會被DQ，如果跟番（宣誓要求）等於認同DQ係啱。」

被問及係咪會參與嚟緊嘅九龍西補選同民主派初選，阿基冇正面回應，只係話按進度推算，民主派如要搞初選就要十日內啟動，十月中有結果，佢聲稱依家冇考慮參選，但如果非建制派完全唔肯放棄特權文化，佢就會積極考慮自己嘅角色。由此觀之，莫非阿基已經為再次披甲上陣諗定劇本？

卓妮