中環出更：傷膝張國鈞撐拐杖北上讀書
唔少議員趁住立法會放暑假外遊充電，但係身兼行政會議同立法會議員嘅張國鈞（Horace）日前就北上讀書，佢喺Facebook（Fb）貼咗張相，見佢篤住支拐杖去清華大學，原來佢膝蓋半月板受傷，做咗個小手術，形容係「足球員必經階段」咁話。仲識講笑，睇嚟傷勢都不太嚴重嘅！
Horace話喺六月中踢波受傷，兩星期後立法會足球隊同領事聯隊友賽時，仲勉強落場，搞到加重傷勢，之後專科醫生建議佢盡快做手術，所以上周三入院，翌日出院後，已撐住拐杖落區滅蚊添，醫生聽到佢做完手術，仲要上北京都皺晒眉頭喎。佢話預計一個月後會做物理治療，休息兩個月應該就冇乜事。
哪吒耕田被笑似拍《大地恩情》
講到學習，西貢區議員方國珊（哪吒）就學割禾。佢早前喺Fb上載咗幾張割禾同牛拉車嘅相，原來佢應中華青年交流協會去台灣交流，亦去咗宜蘭白米社區餐廳，體驗下耕種嘅程序同勞苦。其中一張相見佢戴住毛巾，捲起褲腳踩入田，雙手揸住禾稻，簡直好似攞Pose咁。另一張就係佢企上一個架，由隻牛去拉佢，睇嚟應該係牛落田拉耙翻泥嘅，睇佢踩上都好淡定，有網民仲留言笑稱好似拍《大地恩情》咁，仲話「哪吒踏風火輪在草地」添！認真搞笑。
之但係早前去完日本旅行嘅立法會工程界議員盧偉國（WK）早幾日又飛嘞，今次佢去咗法國西南部趁墟，仲話蔬果、肉食、芝士、服裝、飾物同乾濕貨都有，而且周圍都係中世紀建築，目不暇給。結果有乜收穫？佢買咗頂草帽囉！本身鍾意煮嘢食嘅WK仲四圍搵食，大快朵頤。唔知佢返港後，「盧家廚房」又會煮啲乜嘢新菜式呢？
卓妮