廣東話入面有句說話叫「畀個官你做」，揶揄人做嘢漏氣、手腳慢。特區高官正正係呢種懶官嘅典範，佢哋最出名就係後知後覺，做樣樣嘢都係踢一踢至郁一郁，香港唔立立亂至奇。
呢，登革熱上月初爆發，港府拖咗差唔多成一個月，先至決定將之前每三個禮拜公布一次嘅誘蚊產卵器指數，改成每個禮拜公布一次，話係等各區居民提高對防蚊嘅警覺喎。早知今日，何必當初，呢啲咪就係事後諸葛亮囉，家陣就嚟仲秋，天氣漸涼，所謂秋後蚊蟲長不了，港府家陣至加快公布蚊患指數，遲唔遲啲吖！
當然啦，今次港府鬼拍後尾枕，亡羊補牢，證明咗提早公布蚊患指數，喺技術上絕對可行，之前死拖爛拖三個禮拜至報一次，完全係懶政怠政作風，「非不能也，實不為也」。
係人都知，疫情瞬息萬變，防疫最講究時效性，早公布可以早防範，早防範就可以避免疫情爆發。若果港府一早公布蚊患指數爆燈，等市民有所警惕，就唔會搞到短短十幾日廿幾人中本地登革熱喇！講真，根據港府過去嘅做法，呢個月先公布上個月嘅蚊患指數，指數早成明日黃花，有鬼用咩。所以話，今次本地登革熱爆發與其話係天災，不如話係人禍，係港府罔顧市民生命健康嘅必然結果。
最諷刺嘅係，呢頭食衞局局長係威係勢宣布補鑊措施，嗰頭市民上去食環署網頁一睇，原來上個月嘅誘蚊產卵器監察指數失實，全港五十七個監察地區，只係公布咗二十七個，剩番嗰三十個仲計緊喎，真係旨意官老爺做嘢，蚊都瞓蛇都死呀。睇到喇，呢班懶慣、Hea慣嘅官僚，三個禮拜報一次都搞到踢晒腳，遲吓個個禮拜報一次，唔倒瀉籮蟹就有鬼咯。第時會唔會出現數據造假，欺騙公眾，大家真係要金睛火眼(目及)到實。
講嚟講去，港官只係得把口「與民同行」，實際上就係同蛇蟲鼠蟻同行，同烏煙瘴氣同行，搞到香港由國際金融中心淪為瘟疫不斷嘅悲情城市，從九七年爆發世界首例人類感染禽流感以來，一時沙士，一時豬流感，一時日本腦炎，一時登革熱，睇怕遲啲爆埋非洲伊波拉瘟疫都有之。枉香港成日自詡先進地區，實情同第三世界差唔多嘅咋。
一句到尾，港府大事唔識做，小事做唔好，連對付蚊子老鼠害蟲都束手無策，點有能力處理到房屋、安老等大問題呀，點夠膽對付有外部勢力撐腰嘅反中亂港集團呀。老虎屁股不敢摸，走狗尾巴不敢碰，港獨勢力如野火蔓延，香港無日安寧，之唔係咁解囉。