政情：收料站：立會委員會爭櫈仔 傳建制狙擊兩白鴿
立法會新一年度會期下月中開鑼，各委員會嘅正、副主席爭櫈仔之戰亦即將開始。據了解，建制派同民主派都未敲定好角逐名單之際，建制一方率先提出「黑名單」，點名民主黨（白鴿黨）議員尹兆堅同鄺俊宇，講明唔會畀兩人分別擔任房屋事務委員會及福利事務委員會主席。
尹兆堅依家係房屋事務委員會副主席，鄺俊宇係福利事務委員會副主席，以往委員會都採取正、副主席輪任形式，每兩年互換一次，因此尹按慣例應接工聯會麥美娟棒出任主席，而鄺則接同係民主陣營嘅社福界邵家臻嘅主席位。但據悉建制陣營早已開腔，講明唔畀兩人接棒，又準備「冧友」入兩個委員會爭位添！
反被質疑為泛民內部競爭手法
民主陣營中人分析指，考慮到下年區議會換屆選舉，以及再下一年嘅超級區議會選舉，建制派認為尹同鄺係大威脅，所以禁止佢哋做主席藉此減低兩人曝光率。不過，建制派副班長陳克勤就否認有關說法，指建制內部都未坐低傾委員會正、副主席名單，質疑呢啲係民主派內部競爭嘅手法。
老實講，喺今屆立法會一開波，雙方喺委員會爭櫈仔一事談判破裂，搞到各自「冧友」入委員會爭位，所以雙方對今次協調都不抱樂觀想法。