政情：申貨櫃設議辦冇回音 袁海文斥民政署拖延
今屆區議會任期只剩約一年多，至今仍有部分區議員未有辦事處。深水埗區議員袁海文曾申請在荔枝角道天橋底設貨櫃議辦，民政署過去曾作兩次地區諮詢，但至今未有回音，佢尋日喺區議會大會上提出無約束力動議，促請民政署對其申請支持，最終喺十二票支持、十一票反對下通過經民協譚國僑修訂嘅動議，修訂動議係刪除咗「不要再拖延民選議員設立議辦的申請」。
該區前任議員批袁「搞冧樓價」
袁喺會上指過去有建制派區議員申請設立貨櫃辦事處並獲接納，甚至係佢喺區議會選舉落敗嘅對手都可以喺選區內設立辦事處，而佢嘅申請就被拖延逾兩年，令人懷疑係咪有政治考慮。佢又話過去民政署所收集到嘅反對意見，當中包括指佢嘅貨櫃議辦似棺材、會破壞該地綠化和交通、製造污染等等，認為作為議員，應要「有把尺」，衡量反對原因係咪合理。
經民聯梁文廣話該區嘅前任議員係佢嘅黨友李祺逢，而該黨喺區內嘅辦事處已設立約十年，認為袁指落敗後先設立嘅說法屬誤導，佢認為民選議員喺區內設立辦事處是正常不過，但不顧當區居民意願、放喺區議會上討論係不負責任嘅做法，而李祺逢則批評袁浪費納稅人嘅錢，又指袁「搞冧樓價」，即使再作諮詢亦會同樣有好多人反對。