政情：地區樁腳醞釀退黨 葉劉戰超區危危乎

新民黨喺四年前同公民力量結盟，公民力量有十九名區議員一併加入新民黨，令到該黨區議員人數增加逾倍，由十二席大幅增至三十一席，地區實力明顯有所增加。不過，上屆區議會失利，得番二十六席，再喺時任副主席兼雙料議員田北辰，喺上年連同六名區議員退黨，令到新民黨現時只得番十九名區議員。

隨時冇足夠提名入閘

葉劉早前表明有意喺下屆立法會選舉中，由地區直選改循超區參選，讓路畀黨內第二梯隊上位，但佢當時都自言有危機，轉戰超區有機會落敗。而現時葉劉轉戰超區先要搵區落腳，又要擔心贏取區議會議席後，有冇足夠提名入閘，葉劉轉跑道入議會真係唔易。事關超區嘅提名門檻為十五位民選區議員，新民黨目前有十九席，如果可以喺明年嘅區選中維持，就能夠爭取到一張超區入場券。不過，近期有新民黨中委、沙田區議員黃宇翰計劃退黨，就令葉劉大計添危機，版圖趕唔切擴張，但就少咗隻地區樁腳囉！

黃宇翰上月尾嘅沙田區議會發展及房屋委員會會議上，和議一項反對馬料水填海工程嘅動議，與新民黨立場不一致，而葉劉被問及此事時，就以「潮流興抗爭」作回應，已經睇得出黃同新民黨愈走愈遠。而黃宇翰近日就上載辦事處同橫額相片，見佢已經只有公民力量牌頭，無咗新民黨嘅牌頭，更稱「少些東西少些負擔」，退出新民黨意味甚濃。

有新民黨中人對於黃宇翰退黨並唔意外，因為佢有強烈個人意見，估計馬料水填海一事並非導火線，而目前新民黨地區樁腳唔多，任何人退黨都會帶來影響，但目前未有其他人一齊退出嘅情況，而中委仍未收到其退黨申請。新民黨副主席、公民力量主席潘國山就話黃宇翰退黨有迹可尋，目前未完成所有程序，佢都要同黃宇翰傾吓並會游說佢留低，當中會講吓新民黨情況，睇嚟佢都知道每一個樁腳對新民黨發展相當重要。