中環出更：泛民鬧爆梁君彥 轉移視線阻修議規
民主派過往經常喺議會拉布、擾亂秩序，建制派研究修改立法會《議事規則》，以懲罰行為不檢嘅議員，立法會議事規則委員會（議規會）前日正式向全體立法會議員發信，就係咪要進一步修改《議事規則》，引入停賽同罰款制度收集議員意見。二十四名民主派議員尋日發表聯合聲明反對停賽罰款制度，並轉移視線攻擊立法會主席梁君彥過去多次濫權。
聯合聲明反對引入新處分
建制派內部醞釀對議員行為不檢被逐出會議廳或會議室嘅議員加以懲罰，包括禁止佢哋喺一段時間內開會、罰款或直接扣薪等，議規會前日正式發信諮詢議員，為期一個月，廿四名民主派議員，包括民主黨、公民黨等四大政團發表聯合聲明，表明堅決反對引入新處分，批評有關建議係打壓議會內嘅反對聲音，意圖令民主派失去僅有嘅對抗惡法空間。
聲明又乘機鬧爆梁君彥過去多次濫權、破壞先例、違反作為立法會主席嘅政治中立性，表明任何加大主席權力嘅建議都係完全唔合理，只會令主席濫權行為變本加厲，反建議議規會檢討《議事規則》賦予主席嘅權力。
聲明又稱，選民對議員於議會內嘅行為自有判斷，輿論亦會有所評論，重申「新處分完全不必要」。話時話，唔通民主派以為咁樣轉移視線，就可以拖延或抵擋到建制派修改議規嘅攻勢？
卓妮