中環出更：容蔡美碧鼓勵長者 成社會新力量
香港人夠晒長壽，想九十幾歲仲通街走，保持身體健康最緊要。黃金時代基金會主席容蔡美碧早前喺香港長者產業聯會（長聯）做分享，佢話隨住人類壽命愈嚟愈長，有啲舊式思維應該改變，例如認為人老咗就冇生產力。佢覺得人要做到做唔到為止，唔應該講「退休」，長者都可成為顛覆社會嘅新力量。
容蔡美碧舉例話台灣嘅環保做得咁好，印證咗同長者喺社區積極參與息息相關，佢正想將呢種經驗引入香港。佢哋新成立嘅黃金時代學院今個月即推出新課程，培訓四十五歲以上嘅「黃金一代」做環保及氣候保育大使，希望善用長者力量推動本港嘅環保工作。
胡廣發師傅教做八段錦
同場仲有深圳市養老服務業協會會長陳開萌、長聯副會長鍾明志同陳長有等人。長聯仲邀請養生氣功專家胡廣發師傅，教大家做八段錦氣功，胡師傅講嘢好風趣，一時示範點樣搖頭擺尾去心火，一時教做射箭姿勢改善視力，坐喺台下嘅長聯會長蔡少偉（William）聽到入晒神，笑笑口話想開始學添！
William話八段錦氣功係歷史悠久嘅養生術，所以特登請胡師傅嚟推廣吓。今年初佢聯同一班志同道合嘅商界朋友成立長聯，就係想義務推廣養老行業嘅發展，畀年長一輩活出豐盛晚年。講起豐盛晚年，William嘅爸爸蔡衍濤及媽媽都已八、九十歲，身體都好好。佢話爸爸經常游水及行路，媽媽就鍾意打牌，一星期打四、五日，再加上飲食健康及心境好，自然身體好喇！
卓妮