港產官僚冇嘢叻，最叻就係化神奇為腐朽。好似下白泥咁吖，號稱全港影日落最靚嘅景點，加上紅樹林等自然景觀，吸引唔少人慕名而至，點知因為環保官僚監管失職，搞到附近堆填區污水滲漏，唔單止臭氣熏天，仲連累埋附近魚塘啲魚蝦反晒肚，呢啲咪正牌累人累物累街坊囉！
下白泥村村民最近投訴，話屯門稔灣堆填區懷疑滲出垃圾汁污染附近河流，導致大量養殖嘅魚蝦死亡。當局之後派人去現場抽查水辦，發現阿摩尼亞濃度超標二百倍至九千五百倍不等，簡直嚇死人。有村代表嗌晒救命，話自從有咗堆填區後，水產大量死亡，每次損失三、四千萬港元，亦有人慨嘆生意難做，長此下去惟有關門大吉領綜援。
錢銀損失仲係其次，萬一市民食咗受污染嘅水產，後果不堪設想。呢，下白泥村對開后海灣，之前就試過有大量貝殼類海產離奇死亡，發出腐爛惡臭，村民當時就懷疑係堆填區污水流入大海所致，要求環保署交代，後來不了了之，致使污染問題愈演愈烈，直至「臭名遠揚」，連對面深圳居民都鬧爆。幾年前港府計劃擴建堆填區，深圳市人大代表罕有咁聯署反對，連當時嘅市長都開到聲表達關注，真係唔到你唔服。
咁官老爺又點解畫？佢哋例牌菜又係輕描淡寫大派定心丸，強調今次係首次發生同類事件，又話附近環境及水體冇受到明顯影響，亦未發現大量藻類或魚類死亡；至於涉事承辦商，署方就話喺佢哋嚴厲警告下，已立即進行補救措施喎。
真係官僚靠得住，豬乸會上樹。有議員踢爆，該承辦商舊年曾因違反《水污染管制條例》及合約條款被罰近八百萬港元。同樣由該承辦商負責嘅屯門望后石谷堆填區修復工程，甚至試過連續幾個月無法處理污水，搞到要運去政府設施處理。議員質疑承辦商劣迹斑斑，居然仲可以毫髮無損，生意滔滔，唔通係第二間禮頓？計功夫茶話齋，係咪有人又試玩「挾洋自重」，仲要查過至知，但港產官僚無監無管就珍珠都冇咁真，畀你係外判商都求求其其，敷衍了事喇！
講到呢度，大家知點解當年港府推「三堆一爐」阻力重重喇。廢官管理現有堆填區已經問題多多，鑊鑊新鮮鑊鑊甘，居民深受其害，點可能唔擔心擴建堆填區，甚至起個新嘅焚化爐吖。
大家有眼見，港產官僚搞環保唔係甩漏多多，就係樣樣徵費，推卸責任，唔怪得有人質疑班友係咪食多咗受污染嘅海鮮，阿摩尼亞中毒，搞到冇心冇肺冇靈魂，唔係冇道理o架。