政情：為區會奪盃傷腳 李世榮對踢波有陰影
沙田區議員李世榮早前腳傷，搞到出入都要坐住輪椅，但近日見佢已經行得走得，睇嚟過咗接近一個月已經好番喇，但佢就話仍然未完全痊愈，因今次受傷因踢波造成，仲搞到對踢波都有陰影添！
李世榮上月尾代表沙田區議會參賽，一日之內踢咗三場波，更歷史性贏出冠軍，直言係建制同泛民合作嘅成果。不過喺球賽中擔任清道夫嘅佢，為咗阻擋對手一次射門而受傷，但佢就恃住以前讀書有踢波而頂硬上，點知第二日瞓醒發現完全唔對路，發現整傷咗腳踝韌帶，直言唔敢再踢波喇！
坐咗十幾日輪椅 遙距辦公
今次受傷搞到坐咗十幾日輪椅，佢就當自己放咗十幾日暑假，不過休息期間仲要遙距處理工作，但都難得地有時間煲劇，所以現時變得緊貼潮流。但抖完就要專心工作同讀書，因為佢將於九月份開始為期兩年半嘅碩士課程。