政情：翟健民個仔係健康守門人
喺一個家庭之中，總係由媽媽扮演健康守門人角色，事關男士同小朋友通常食唔講求健康。不過，香港藝術品商會理事長翟健民同太太Priscilla就經常被個仔翟凱東（Ronald）(目及)住。Priscilla笑笑口話，有時食舊朱古力都被個仔哦，話下晝四至六點先至食得喎。點解咁搞笑？
修讀營養學 操Fit入球隊
原來Ronald喺美國讀大學時主修商科，但因為要操Fit啲以便加入球隊，所以選擇副修營養學，自此就開始咗注重飲食嘅人生。至於朱古力要喺四至六點食，同中醫講嘅經絡養生時間冇關，只係因為早啲食會影響正餐，夜啲食就會變成糖分啫！
唔講唔知，依家係肌肉男嘅Ronald細個竟然係超級肥仔，中學畢業時有成二百三十磅，後來讀咗營養學，頭一年就勁減五十磅。Ronald笑稱佢第一次放假返港時，去機場接機嘅媽媽都唔認得佢，諗起都覺得好笑。