政情：立會近民記樓層爆玻璃凶兆？
呢排天氣好唔穩定，經常橫風橫雨，周圍都好多冧樹枝、漏水等小意外發生，就連立法會大樓近日都爆玻璃，要圍封大樓外部分嘅行人路。今次爆玻璃嘅位置喺五樓同六樓之間，眾所周知，六樓就係民建聯（民記）嗰層，係咪意味着民記有乜嘢唔好嘅預兆呢？
立法會大樓對出一段行人路被圍封，相當惹人注目，仲擺放咗「維修中」嘅告示牌添！再望上去大樓嘅窗戶，明顯見到其中一塊玻璃唔同色，原來係爆玻璃。數番樓層正正就係五樓同六樓之間，而對上六樓嘅位置，就係一眾民記議員嘅辦公室，聽落真係唔多好意頭，睇嚟民記呢排都要醒醒定定嘞！
已加貼膠膜封路待維修
立法會秘書處回覆，話清潔大樓玻璃幕牆嘅承辦商喺例行清潔期間，發現五樓與六樓之間一塊玻璃出現裂痕，秘書處通知建築署，該署人員到場檢查後，已即時採取臨時安全措施，包括加貼膠膜以保護有裂痕嘅玻璃，同埋圍封部分行人路，待天氣穩定後，建築署將更換玻璃。睇嚟各位平日路過都要小心啲嘞！