中環出更：內地食飯 盧偉國靠林健鋒找數
情侶外出食飯，邊個找數都冇乜所謂，估唔到立法會工程界議員盧偉國（WK）食飯不時都要靠商界議員林健鋒（Jeffrey）幫佢找數，唔通WK有財務困難？二人尋日同傳媒茶敍時，Jeffrey就大爆，原來WK嘅困難係開唔到內地電子錢包，所以去內地考察同訪問時，都要靠自己幫手找數！
未開設電子錢包
WK話之前金融界議員陳振英幫一眾立法會議員開內地電子錢包嘅時候，自己剛好有事去唔到，之後再嘗試去銀行開，但銀行介紹畀佢嘅計劃淨係可以喺內地部分地區用到，佢覺得唔夠用，所以至今都未開設，平日喺內地都要靠Jeffrey幫佢畀錢。
Jeffrey就話同WK冇計得咁清楚啦，因為WK經常親自下廚煮番兩味畀佢食，包括WK拿手嘅「黯然銷魂飯」，即叉燒煎蛋飯，仲有Jeffrey好鍾意嘅家鄉焗魚腸。聽落都覺得好味，咁計落，隨時Jeffrey仲着數喎。
卓妮