中環出更：晏紫為網球棄學琴教囡囡做事堅持
東華三院今年首次舉辦街頭音樂會，壓軸一場早前喺銅鑼灣上演，一眾東華三院董事局成員都有到場欣賞。卓妮見到總理晏紫，佢曾喺○六年溫布頓同澳洲網球公開賽女雙冠軍嘅前國家級著名網球手，咪以為打網球成績出眾嘅佢冇學過樂器，其實佢年幼時學過鋼琴，但後來專注網球先放棄，直至廿歲想玩番又發覺錯過最佳機會，後悔冇聽媽媽話堅持。
其實晏紫嘅囡囡都學緊鋼琴，而佢教女方式亦同自己嘅經歷有關，所以佢依家會要求囡囡每日練習鋼琴，唔畀佢三分鐘熱度，就好似佢當年學打網球咁要克服樽頸位，直言打出好成績全靠媽媽當時嘅堅持添！
總理毛宇峯當日一家大細嚟欣賞音樂會，佢都希望畀多啲資源一對子女，等佢哋能夠全面發展，呢個教育方針係同佢自己嘅成長經歷有關。佢就話年幼時學樂器費用高昂，所以得個恨字冇得學，如今自己有能力就非常鼓勵子女學習唔同樂器，因為音樂同運動係最佳減壓方法，希望佢哋至少擅長玩一種樂器咁話，而現階段就畀佢哋接觸唔同樂器先。
譚鎮國支持街頭表演
轉頭見到副主席譚鎮國、文頴怡同埋浩文，仲有總理馮敬安等。而譚鎮國就自言音樂天分去晒妹妹度，自己因坐唔定而只學過短時間鋼琴，不過佢都鍾意聽音樂，好似同太太去外國旅行時，會畀街頭表現者吸引駐足欣賞。近期香港就街頭表演討論得熱烘烘，佢就認為有質素嘅街頭表演能令人放鬆，值得支持喇！
卓妮