香港房屋問題早已係人所共知嘅死症，私人置業固然難於上青天，公屋輪候隊伍更加係長過長城，話就話平均輪候期延至五點三年，都係粉飾太平嘅咋。實情係，即使十八歲就排隊輪公屋，等到年過半百頭髮白都未必上到樓吖，陰功。
呢，有關注青年組織日前向政府提出十一項訴求，包括恢復首次置業貸款計劃、改善單身人士三萬幾人爭二百幾個「白居二」單位嘅情況等，事關根據依家公屋嘅配額計分制，十八歲後生仔想上樓往往要等到五十歲之後至有希望，根本就係漠視年輕人需要，應該恢復三年上樓承諾至啱咁話。關注組織仲警告，搞唔掂年輕人住嘅問題，社會就會積聚怨氣，隨時爆發添。
講真，呢啲所謂訴求，都係慳番啖氣暖肚好過啦。唔係話建議不切實際，而係對牛彈琴，你知啦，班高官不嬲堅離地，根本係脫離民眾。雖則政府成日話「重視青年工作」，不過只係廢噏咋，就連年輕人「想有個竇」嘅訴求，政府都借咗聾耳陳對耳。有年輕人為咗唔想爆額申請唔到公屋，甚至叫老闆千祈唔好加人工，為求有個竇，竟然甘心人望低處，罪魁禍首嘅政府一啲都唔覺得自己羞家，仲叫人哋生多啲對抗高齡海嘯。年輕人連住嘅地方都冇，點成家立業吖，點生兒育女吖，點幫香港成為千萬人口大都市呀？
大家有眼見，房屋問題講咗N咁多年，各界提出過嘅訴求多不勝數，高官們年年話關注，問題就年年惡化。好簡單，高官薪高糧準，有人係「樓王」，有人一早就搞劏房囤地發達，有人就住大屋養番狗仲要僭建，至於特首咯喎，一家人住咁大個禮賓府，佢哋點知道民間疾苦，又點會關心上樓難一族嘅辛酸吖。
政府對房屋問題翹埋雙手，坐等運到，最叻就係叫人望梅止渴，推出所謂「土地大辯論」嚟搵笨，表面睇好似好尊重民意，實際上係推卸責任兼消磨時間，到頭來一句「社會冇共識」，又有大大個藉口乜都唔做。做官嘅都唔去拍板做決定，逼到啲無殼蝸牛日前又去粉嶺高爾夫球場示威，要求改劃高球場建屋喎，其實高球場冇罪o架，無能政府分化社會，激化貧富矛盾，至係罪無可恕，要示威就應該去禮賓府、「門常開」政府總部，要求將呢啲廢官佔用嘅土地用嚟起公屋就差唔多。
講到尾，政府一日胡混度日，社會都永無寧日。狗都有狗窩，年輕人想有個竇都咁難，你話喺特衰政府無能管治下，係咪人不如狗吖？想唔怨氣大爆炸都幾難！