社區爆發迫眉睫 港府滅蚊懶懶閒

特衰政府廣告叫人「小心登革熱,齊來把蚊滅」,不過面對登革熱襲港,港官唔止粗心大意,滅蚊工作更加係做啲唔做啲。家陣社區大爆發迫在眉睫,當局滅蚊仲係懶懶閒,隨時爆大鑊都似。

嗱,尋日長洲又新增一宗本地登革熱個案,令確診患者增至廿四人。講番呢單新增個案,患者係上個月尾唔舒服求醫,不過當時就被診斷為中暑,後來再化驗至確診係登革熱。講真,登革熱已經係近年夏天嘅常客,香港醫療體系都可以咁無心裝載,誤診為中暑,反映由政府到民間都掉以輕心。

雖然食衞局話各部門近一星期已出動過萬次滅蚊,弊在呢啲補飛工作做到唔湯唔水。就講其中一個爆發源頭獅子山公園吖,冇錯,政府係就係破天荒封園一個月,兼且派咗食環署去附近黃大仙加強滅蚊,房署仲話安排喺屋邨加裝滅蚊燈添,好似好積極咁款,查實只係將之前懶做、冇做嘅工作做番,叫做好過冇嘅咋。

呢嗱,尋日黃大仙區議會舉行特別會議,當局「佛系滅蚊」就畀區議員鬧爆,最離譜係食環署以「唔係管轄範圍」做藉口,拒絕喺私人屋苑滅蚊。要知道,傳播登革熱嘅白紋伊蚊能夠飛到四百米到八百米嘅範圍,而且唔會好似食環署咁分清楚河漢界,到時殺入私人屋苑繁殖,所謂全港滅蚊咪得個吉?再講吖,港府拒絕與時俱進引入新技術減低蚊子繁殖,至今依然倚賴噴灑蚊油「古法」滅蚊,唔事倍功半至奇喇。

冇計嘞,食環署最叻就係蛇王吞POP、選擇性工作,慣性搬出唔同理由拒絕做嘢。早前為咗唔想處理灣仔一部廢棄三年嘅電單車,就話他人財物無法處理;當年唔想處理西貢公眾地方晾曬衣物,又話冇法例授權採取行動;最近唔想處理南亞假難民,深水埗「南亞村」木板屋就拆啲唔拆啲,總之「欲卸之責,何患無詞」。見微知著,食環署唔願郁、唔想做,滅蚊防蚊工作點會做得好?全港多區嘅誘蚊產卵器指數都達到警戒水平,證明所謂加強滅蚊有姿勢冇實際。

大家有眼見,香港唔止蚊患處處,鼠患亦困擾多區,令衞生情況倒退到同第三世界有得揮。萬一登革熱喺社區爆發,以香港醫療十個煲七個蓋嘅情況,到時唔止倒瀉籮蟹,崩潰都有之。

講到尾,一個地方老鼠橫行,蚊患肆虐,同官僚懶惰有莫大關係。當年沙士血的教訓,港官冇引以為戒,咁多年嚟搞衞生都係求求其其,一旦登革熱連同其他奇難雜症同時拍門,咁就喊都無謂。