香港警方近日高調宣稱，為配合粵港澳三地警方代號「雷霆18」的聯合行動，過去三個月如何採取了一連串行動，拘捕了四千多人，當中有逾二百名南亞裔，檢獲毒品、私煙及仿製槍械等物品，總值三點一三億港元。警方發言人同時強調，黑社會相關罪行多年來都是佔香港整體罪案約百分之三，近年也無特別偏離此數字。厲害了，我的警！能夠遏止黑社會壯大，真係飲得杯落！
之不過，黑社會相關罪行沒有特別偏離整體罪案率，卻有南亞匪幫、假難民日日搞事犯案，佢哋所犯嘅罪行五花八門，襲擊、傷人、謀殺、藏毒、藏槍、縱火、刑毀、非禮、強姦、行劫、盜竊、勒索、販賣私煙、安排非法入境、製造偽鈔、收波䌫……日日新鮮鑊鑊甘，創意勝過創科局！
話口未完，日前又有南亞裔在油麻地當街搶劫一間找換店的東主母子，事主奮起反抗，力保不失，惟同告受傷送院，女東主大呻見到南亞裔人「驚到震」，打算結束生意。所以話啫，即使黑社會犯罪率穩定，但最弊係南亞裔犯罪率上升，黑社會收「陀地」都未至於令店主「驚到震」要落閘唔做，南亞幫卻做得到。喂，政府冇地建屋，想收地？搵南亞幫啦！咁就唔使乜鬼土地大辯論一味廢噏。
講真，「雷霆18」掃黑除惡只能凸顯內地的高效，無論是公安部高官或廣東警方，莫不將打擊保護傘放在首位，連匿藏在華麗地氈下、陰濕地洞裏的蛇蟲鼠蟻都一掃清，不少護黑庇惡官員落鑊。反觀香港，冇錯係大把魚毛蝦仔被捕，卻沒有一條大魚落網，更遑論大鱷！綽號「上海仔」嘅黑幫和勝和前坐館兼泰國大毒梟郭永鴻，就是在警方行動前聞風潛逃。香港嘅「雷霆」行動吹到有幾叻有幾巴閉，但若大鱷與保護傘逍遙法外、毫髮無損，就是對警方反黑的最大諷刺！「雷霆」兩字千斤重，何堪又淪豆腐渣？