政情：法律博士暫唔執業 鄭達鴻寧搞政治
立法會同區議會有唔少議員都係讀法律出身，好似東區區議員鄭達鴻（阿達）兩年前就去咗城大讀法律博士（JD），今年順利畢業，如果讀埋法學專業證書課程（PCLL）、過埋實習就可以申請做律師喇。不過阿達就話，暫時冇報到PCLL，因為想搞晒啲政治嘢先再決定喎。如果要做律師，佢都係對大律師較為有興趣，覺得相對彈性啲。
呻冇時間陪家人
平日做地區工作都夠晒忙，仲要修讀法律，阿達都呻冇時間陪屋企人。佢透露，考試期間仲要喺辦事處過夜添，事關夜深人靜先有時間溫書，但好彩辦事處有床，唔怕冇地方瞓。由於城大係計算出席率，阿達唔少同學一讀完學士課程就即刻讀埋JD，出席率較理想，但佢因為要兼顧地區工作就有啲失分喇。至於成績如何，佢笑笑口話GPA過3，成績都唔錯啦。