政情：容永祺接替陳仲尼 下月起出掌考評局
港府尋日宣布委任資深保險界人士容永祺，接替陳仲尼出任考試及評核局（考評局）主席，任期由九月一日開始，為期三年。話時話，近期有曾任考評局評卷助理嘅人士，疑外洩文憑試保密資料事件曝光，外界猜測容永祺上任後首要工作，可能係檢視點樣加強公開考試嘅試卷保密安排。
首要工作料加強試卷保密安排
容永祺對是次委任感到榮幸，佢稱讚即將卸任主席嘅陳仲尼，過去六年為推動考評局持續發展提出寶貴意見，貢獻良多。考評局秘書長蘇國生就話，好高興容永祺將加入考評局，形容對方對社會同教育服務充滿熱誠，相信喺佢領導下，考評局將繼續發揮所長，舉辦可靠同公平嘅考試及評核。