政情：追殺沙中線醜聞 立會鬧雙胞
立法會下周五「鬧雙胞」，分上下半場就港鐵沙中線問題追殺政府。立法會網頁顯示，由實政圓桌立法會議員田北辰（田二少）任主席嘅立法會鐵路事宜小組委員會，當日上午會討論鐵路設施沉降問題，包括就沙中線工程地盤周邊樓宇及其他設施出現沉降進行討論。而同日下午，航運交通界議員易志明任主席嘅立法會交通事務委員會，會召開兩小時會議，討論沙中線紅磡站擴建部分嘅連續牆及月台層被指欠妥嘅鋼筋工程有關事宜。
田北辰先開會「飲頭啖湯」
有建制派議員形容今次會議安排好特別，因為立法會暑假休會期間好少會開特別會議，就算開，都好少「鬧雙胞」各自修行。該議員又話，雖然名義上鐵路事宜小組同交通事務委員會討論嘅議題略有分別，但共通點係都同沙中線工程醜聞有關，因此估計到時議員提問嘅內容都難免會有所重複。
另有建制派議員就話，雖然當日會議「鬧雙胞」，但相比之下，田二少主持嘅鐵路事宜小組先開會，加上係討論近期熱爆嘅沉降問題，會有「飲咗頭啖湯」嘅效果喎。