中環出更：曾素麗落區餵蚊 美腿變豬蹄
登革熱爆發，政府滅蚊無能，唔踢都唔郁，全港十八區嘅區議員都紛紛落區督促部門加緊滅蚊工作。沙田區議員曾素麗（Yen）落區時，就因蚊患嚴重，搞到自己都出事，隻腳被蚊狂叮十幾下，小腿同腳掌都係一粒粒嘅「蚊瘌」，又紅又腫，美腿頓變豬蹄。佢話，蚊患情況已嚴重威脅居民健康，批評食物環境衞生署滅蚊同防蚊力度不足，要求該署同屋苑管理公司加強滅蚊同防蚊措施。
批食環滅蚊工作不足
早前被百厭蜜蜂捐裙底「非禮」臀部中招，搞到要入院嘅Yen日前落區視察蚊患，雖然佢已經着咗長褲，成隻腳淨係露出腳踝位置，兼且只係逗留咗短短幾分鐘，但都畀蚊叮咗十幾粒「蚊瘌」，右腳更係重災區，成隻腳掌都紅晒同腫晒，好彩無出現發燒、頭痛等登革熱病徵。佢話，事前已噴咗蚊怕水，但都冇用，又苦笑稱自己一向惹蚊，朋友都當佢係「人肉誘蚊器」，不過今次蚊患太嚴重，即使佢做「誘餌」，同事都中招。
白滑美腿變紅腫豬蹄，係女士都嬲嬲，Yen就要求食環署加強防蚊同滅蚊工作，多啲巡查屋苑範圍，提醒持份者注意積水，唔好搞到啲蚊威脅市民安全咁話。
卓妮