中環出更：議員慈善接力賽扮大媽蝙蝠俠
中環聽日舉行慈善接力跑步比賽，立法會議員周浩鼎（Holden）、麥美娟（Alice）同鄺俊宇（Roy）會組隊參賽，佢哋尋日仲一齊搜羅奇裝備戰。天氣預報比賽當日最高氣溫超過三十度，但Holden就堅持扮蝙蝠俠，到底係咩驅使佢大熱天時着到咁，係愛定係責任呀？
話說三位議員參加咗推廣健康嘅籌款活動「鼠戰中環」，出盡法寶鬥搶鏡，不過見佢哋所揀嘅奇裝，實在令人擔心跑唔跑得郁。Holden解釋，因為四歲嘅囝囝鍾意蝙蝠俠，一聽到佢扮蝙蝠俠，就好興奮咁叫好，所以佢目標非常清晰。不過，佢喺接力賽中跑最後一棒，要長時間着住件奇裝，Alice聽到都忍唔住笑，仲送佢一句：「我真係恭喜你呀！」
麥美娟笑周浩鼎「為仔死」
Roy見到之後都驚Holden會熱死，Alice隨即笑Holden係「為仔死」，又話結咗婚，有小朋友嘅人先會咁做，仲乘機追問幾時到Roy。Roy聽到Alice咁問，竟然答「好快o架喇！」唔通立法會好快又再辦喜事？
Holden揀衫就為囝囝，而Roy就考慮實用性，所以特登揀咗短褲，話希望冇咁熱，可以跑快啲。至於Alice原本想扮卡通配角，襯番佢平日做開主角嘅姪女，不過想搵嘅嗰幾套服飾都搵唔到，所以最後揀咗家庭主婦造型，仲自嘲為「大媽」。
三位議員表面上嘻嘻哈哈揀奇裝，不過事前都有「針鋒相對」。話說Roy開頭遲到，到埗見Holden同Alice已經揀好衫，就話咁似立法會夠票就得，Alice就不甘示弱話遲到冇票投。跟住Roy又反擊，話重要嘅就會出現，仲叫佢哋狙擊港鐵沙中線沉降等具爭議問題時唔好「鼠」咗去。呢個組合火藥味咁重，到底係咪合作到o架？
卓妮