政情：劉國勳社區幹事 同「四眼哥哥」撞樣
人有相似，有時真係好難分，正如好多人都會將工聯會嘅立法會議員何啟明同民協嘅深水埗區議員何啟明認錯，兩個人似樣兼同名同姓，經常被調亂，就連立法會議員劉國勳嘅社區幹事林智洋，竟然同另一議員鄭松泰嘅社區主任、綽號「四眼哥哥」嘅鄭錦滿「撞樣」，不論髮型、五官抑或係副眼鏡都九成似，連劉國勳都講笑話擔心居民將兩人混淆。
林智洋留長髮 被認做梁天琦
林智洋同鄭錦滿兩人面形同五官已經似足八成，前者啱啱開始落區時，仲要梳埋All back頭同戴副粗框眼鏡，結果同鄭錦滿好似餅印咁，甚至連所屬政黨嘅黨友都搞錯咗，問劉國勳點解帶住「鄭錦滿」喺區內周圍走。
為咗同鄭錦滿「斷絕關係」，林智洋自願留長頭髮，左右兩邊唔再「剷青」，不過呢，今次就輪到有街坊誤以為佢係本土民主前線前發言人梁天琦，搞到佢好尷尬。