爛空管故障叢生 民航處大話成精

香港民航處冇嘢叻,最叻就係千揀萬揀,揀套百孔千瘡嘅爛空管系統,仲要鑊鑊出事都係講大話死撐,再咁落去真係遲早釀成空難,到時後悔就太遲喇。

呢,民航處套爛空管系統上星期咪又跪低咗囉,當時東網指事故長逾半小時,不過衰咗唔肯認嘅民航處就發新聞稿「澄清」,死撐話由主系統出事到轉用二號系統,歷時只係六分鐘。正所謂,真的假不了,假的真不了,民航處尋日就被踢爆,原來當日主系統兩個航班數據處理器同時瓜柴,由重啟系統到進行數據同步,搞咗接近成粒鐘,先可以轉用備用系統。民航處謊言被拆穿,仲死雞撐飯蓋,話係以開誠布公嘅態度嚟同公眾交代喎。乜嘢叫做無恥者無敵?民航處咪人辦咯。

講真,香港作為國際航空樞紐,暑假又係外遊旺季,航班有幾密可想而知。新空管系統三日一小鑊,五日一大鑊,啟用兩年唔夠,鬼機、疊影、誤鳴、飛行間距不足乜都齊,但民航處唔係從根本上解決問題,竟然係大話精上身,交代事件吞吞吐吐,不盡不實,瞞上欺下,愚弄公眾,仲話好重視事件,尋求長遠解決方案喎,搵鬼信咩!

講起呢套爛空管系統,功夫茶火都嚟埋,前特首曾蔭權爵士拍板,民航處慧眼識爛材,大拿拿浪費十五億元事小,最弊係問題叢生,搞到空中驚魂不斷,乘客飽食驚風散。呢,上個月有客機抵港,臨降落至發現跑道上仲有另外一架機,要緊急抽頭先至避過一劫,令人抹一額汗,民航處都仲可以死撐話空管系統「運作正常」。咁都叫「正常」,唔通真係要去到機毀人亡先知驚?正如美國總統特朗普私人律師話齋:「真相不是真相,唔同人有自己版本嘅真相。」而民航處就係「正常不是正常」,但凡佢話正常,都可以肯定百分百唔正常。民航處只識粉飾太平,同草菅人命有乜分別?

奇就奇在,政府到依家都冇就民航處爛空管又爆大鑊講過半句,遑論問責。點解會咁?因為論到講大話成癖喇喎,成個政府都係大師傅,民航處點可能例外吖。政府由隱瞞高鐵延誤超支,到鉛水事件大話冚大話,講大話講到上晒癮。上樑不正下樑歪,政府其身不正,又點敢正人吖。

講到底,人無信不立,官無信則衰。當政府都帶頭講大話,做個壞榜樣出嚟,民航處臭屎密冚,港鐵沙中線醜聞不斷又有幾奇?塌樹殺人悲劇重演,登革熱本地個案連環爆又有幾奇?爛空管對爛港府,大話精對你呃人,香港想唔衰都幾難。