政情：公民講場：周永新：退休保障作用細有錢先好買年金

終身年金計劃認購反應未如預期，香港大學社會工作及社會行政學系榮休教授周永新尋日喺電台節目上就話，年金對退休保障發揮嘅功能只係微乎其微，仲建議長者因應年紀，必須預留多啲可動用嘅資產，因為一生用於醫療嘅費用有一半以上都係喺人生最後五年用嘅，如要長期照顧或入住院舍，所需費用就更多，因此年金嘅作用只係為有相當儲蓄嘅長者提供穩定收入喎。不過，已經七十一歲嘅周永新，自己就認購咗六十萬元嘅公共年金喇。聽周咁講，長者如果唔係好似佢咁有一定積蓄，都係留定啲錢傍身好過喇！