政情：議員鬥充闊佬公帑豪獎議助
立法會議員可以申請發還工作開支，包括辦事處營運開支、醫療福利、職員薪金、獎金、雙糧等，每年最多可以申領二百六十多萬元，自己睇餸食飯。自去年九月至今，最少三十五名議員曾向議助派發雙糧或獎金，甚至兩樣都派齊，當中九人為地區直選議員，睇落班議員出手都幾闊綽，做晒良心僱主，但講到尾都係使公帑，慷納稅人之慨。
盧偉國獎金雙糧齊發
議員申請發還工作開支中，職員或議員助理（議助）開支佔最大筆，有不少議員每月要花二十萬元支薪。有部分議助好高薪，當中以金融服務界張華峰嘅議助最高薪，月薪接近七萬四千元，而衞生服務界李國麟同金融界陳振英都分別有一名議助月薪逾六萬元。不過，議助領取高薪之餘，更有機會獲發放獎金或雙糧，待遇聽落都唔錯。
工程界盧偉國係唯一派發雙糧同獎金嘅議員，過去一年佢有三名全職議助，而且高薪嘅議助只有四萬七千元，所以平均每月涉及職員開支都唔算太多。佢分別喺去年十月發放二○一六至一七立法會會期嘅獎金，而到十二月時又再向議助出雙糧，兩次合共派咗超過二十二萬元，而最高薪嘅議助一共多獲九萬一千元。
林健鋒派逾廿六萬元
至於商界（第一）林健鋒就成為派發最多獎金嘅議員，一共豪派超過二十六萬元。以佢最高薪嘅議助為例，月薪為五萬一千元，獲派發超過九萬五千元嘅年終獎金，夾埋該月薪酬就領取接近十五萬元，相信惹來唔少議助同打工仔羨慕。
漁農界何俊賢派錢能力都唔差，今年一月就發放接近二十萬元獎金同工作津貼予六名議助，獲發最多獎金嘅一人就有五萬多元，但佢嘅議助薪酬唔算特別高，最高薪嘅都只得二萬三千元。
咪以為只得功能界別議員咁闊綽，新界東直選議員陳克勤都唔孤寒，去年九月就申領咗十八萬元派獎金畀五名議助。佢申報時話，五名議助過去一年表現良好，所以按表現酌情發放獎金作獎勵。不過，克勤其中四名議助都只係獲派大約兩個月月薪獎金，但其餘一個就有三個幾月月薪獎金。須知道議員開支申報係公開嘅，獎金差別咁大，會否影響議助之間嘅和諧呢？