中環出更：林正財重遊舊邨 緬懷濃厚人情味
香港地少人多，為咗應付人口需要，樓宇都向高空發展，而公共屋邨嘅設計亦不斷演變以滿足住屋需求。曾經係「屋邨仔」嘅安老事務委員會主席林正財就慨嘆，舊式屋邨人情味特別濃厚。
林正財尋日回到住過嘅荔景邨，出席一個為基層長者而設嘅健康計劃嘅啟動典禮。醫院管理局前主席梁智鴻、主辦機構關護長者協會主席蘇家駒同該會籌款委員會主席孫國林，以及為計劃提供場地嘅南葵涌社會服務處總幹事周奕希都在場。林話，佢中學時代住喺荔景邨風景樓，返學好方便。重遊舊地嘅佢就覺得屋邨外貌冇大分別，但當年樓下係巴士站，而唔係依家嘅停車場，而街坊以往晾衫就係用俗稱「三支香」嘅插筒式晾衫架。佢又話，以前街坊習慣打開大門，又會問鄰居借豉油，人情味特別濃厚，但呢啲情景喺新屋邨都唔會出現喇。
周奕希玩懷舊不惜工本
今次計劃為期三年，重點係增設認知障礙檢測同支援服務，並用緬懷治療方式、即以懷舊香港作主題去布置中心，以刺激長者嘅認知功能，而目前中心就布置成舊式中藥店。
周奕希話，中心現址以前係舊式士多，為配合治療方式，特登保留咗紙皮石地板，以呈現舊香港嘅感覺。不過，玩懷舊都需要成本，因為維修部分紙皮石地板時難搵材料，而且要老師傅先鋪得靚，所以人工都比較貴。
本身為老人科醫生嘅蘇家駒就話，長者患上認知障礙會有徵狀，但好多年輕人返到屋企只係顧住玩電話，同父母交流少，遲遲未有發現，最終就導致延誤求醫，病情去到中度先接受治療，咁就真係太遲喇。
卓妮